ފަލަސްޠީނުގައި ޚިދުމަތް ދިނުމަށް ވޮލަންޓިއާ ޑޮކްޓަރުން ތިބީ ގަދަކޮށް

ޣައްޒާގެ ސިއްޚީ ނިޒާމު ފުނޑުފުނޑުވެގެން ދިޔަޔަސް، ސިއްޚީ ސާމާނު ނެތަސް އަލްއަޤްސާ ހޮސްޕިޓަލްގެ ވޮލަންޓިޔަރ ޑޮކްޓަރުން ގޮތް ދޫކުރާކަށް ބޭނުމެއް ނޫނެވެ.

ޣައްޒާގެ އަޒްހަރު ޔުނިވާސިޓީގެ މެޑިކަލް ސްކޫލުން ޑިގްރީ ހާސިލް ކުރެއްވުމަށް ފަހު އެހާ އަވަހަށް އޭނާގެ ބަލިމީހުންނަށް ދިރިއުޅުން ބަދަލުކޮށްދޭނެ ނިންމުންތަކެއް ނިންމަވާނެ ކަމަށް އަބްދުއްރަހްމާން އަބޫ ޝަވީޝް ހީކޮށްފައެއް ނުވެއެވެ. އާއިލާއާއެކު ނޫސެއިރާތު ރެފިއުޖީ ކޭމްޕްގައި ދިރިއުޅޭ އުމުރުން 25 އަހަރުގެ އަބޫ ޝަވީޝް އަލް އަގްސާ ޝަހީދު ހޮސްޕިޓަލުގެ ސާޖިކަލް ޑިޕާޓްމަންޓުގައި ވޮލަންޓިއަރކޮށް މަސައްކަތް ކުރަން ފެށީ އޮކްޓޯބަރު މަހުގެ 10 ވަނަ ދުވަހުގައެވެ. އެންމެ ފުރަތަމަވެސް ޖެހުނީ ޒަޚަމްވެފައިވާ މީހެއްގެ އަތްތިލަ ފުރިހަމައަށް ނުވަތަ ބައެއް ކަނޑާލަން ޖެހޭތޯ ނިންމަން ކަމަށް އޭނާ ވަނީ ބުނެފައެވެ.

އްޒާ ސިޓީއާއި ޣައްޒާގެ އުތުރުގެ ހޮސްޕިޓަލްތައް މުޅިން ވެއްޓިގެން ފަރުވާ ނުދެވޭ ހާލަތަށް ދިޔުމާއި ގުޅިގެން ޣައްޒާގެ މެދުތެރޭގެ އަވަށެއް ކަމަށްވާ ޑެއިރް އެލް ބާލާއިން ޒަހަމްވާ މީހުންނަށް ފަރުވާ ދިނުމަށް ވަނީ ނިންމާފައެވެ. ޣައްޒާގެ ހޮސްޕިޓަލްތަކުގެ ތެރެއިން ތިންބައިކުޅަ އެއްބައި ހޮސްޕިޓަލްތައް ހުއްޓުމަކަށް އައީ ހުއްޓުމެއްނެތި ނިރުބަވެރިން ދެމުންދާ ހަމަލާތަކުގެ ސަބަބުންނެވެ. އެގޮތުން 35 ހޮސްޕިޓަލުގެ ތެރެއިން 26 ހޮސްޕިޓަލް މިހާރު ވަނީ ފަރުވާ ނުދެވޭ ހާލަތަށް ގޮސްފައެވެ.

"އަޅުގަނޑުމެންގެ މެޑިކަލް ސާމާނު ވަރަށް މަދު، އިސްރާއީލުގެ ހަމަލާއެއްގެ ސަބަބުން ޒަޚަމްވެފައިވާ ދިހަވަރަކަށް މީހުން ހޮސްޕިޓަލަށް އަންނައިރު، ގިނަ ފަހަރަށް އެއްފަހަރާ ފަރުވާ ނުދެވޭ ސަބަބަކީ އަޅުގަނޑުމެންގެ އާލާތްތައް އެކަށީގެންވާ ވަރަށް ނެތުމުން ސްޓިރިލައިޒް ކުރަން ޖެހޭތީ" އަބޫ ޝަވީޝް ވިދާޅުވިއެވެ.

"އަހަރެމެންނަށް ޒަޚަމްވެފައިވާ މީހެއްގެ ހަށިގަނޑުން ހުރިހާ ޝްރެޕްނެލްއެއް ނަގަން ނުކުޅެދޭ، ހަމައެކަނި އެމީހުންގެ ފުރާނައަށް ނުރައްކާވާ އެތިކޮޅުތައް ނަގަން، އެއީ އަދިވެސް ނުރައްކާތެރި ކަމެއް، ޝްރެޕްނެލް އިން އިންފެކްޝަންތައް އުފެދި ގިނަ ގުނަވަންތަކެއް ފެއިލްވުމަށް މަގުފަހިވާތީ، އެކަމަކު އަހަރެމެން އުންމީދު ކުރަނީ ހަނގުރާމަ ނިމުމުން އެމީހުންނަށް ފޮލޯއަޕް ކުރެވޭނެ ކަމަށް” އަބޫ ޝަވީޝް ވިދާޅުވި އެވެ.

"އާންމުކޮށް ހޮސްޕިޓަލެއްގައި މަސައްކަތް ކުރުމަކީ ބުރަ މަސައްކަތެއްކަން އެނގޭ ނަމަވެސް ހަނގުރާމައެއްގެ ތެރޭގައި ހޮސްޕިޓަލެއްގައި މަސައްކަތް ކުރުމަކީ މުޅިން އާ ތަފާތު ފެންވަރެއްގައި ކަމެއް، މާދަމާ ވާނެ ގޮތެއް ނޭނގެ، ދިރިހުންނާނެ ކަމެއް ނުވަތަ މަރުވާނެ ކަމެއް. އެކަމަކު ދޫކޮށްލުމަކީ އޮޕްޝަނެއް ނޫން." އޭނާ ބުންޏެވެ.

ފިޒިއޮތެރަޕީ ޑިޕާޓްމަންޓުން ހުރިހާ ބަލިމީހުންނަށް ފުރަތަމަ ފަރުވާ ދިނުމަށްފަހު އެމަޖެންސީ ރޫމްގައި ބަލާ، އޭގެ ފަހުން ސާޖިކަލް ޔުނިޓް ނުވަތަ ކުޑަކުދިންގެ ވިންގް ފަދަ އެހެން ޑިޕާޓްމަންޓްތަކަށް ދާ ކަމަށް ވެސް ވިދާޅުވިއެވެ. އަބޫ ސަލީމް ބަލިމީހުންނާ ވާހަކަ ދައްކަވަނީ އެމީހުންގެ ޒަޚަމްތަކުގެ ބާވަތާއި، ކުރިމަތިވެދާނެ އުދަނގޫތަކާއި، އެފަދަ ނުރައްކާތަކުން ސަލާމަތްވެވޭނެ ގޮތްތަކާ ބެހޭގޮތުންނެވެ.