ރައީސްގެ އަމާޒަކީ ކަރަންޓުގެ 33 އިންސައްތަ އިއާދަކުރަނިވި ހަކަތައިގެ ނިޒާމަށް ބަދަލު ކުރުން

ފަސް އަހަރުގެ ދައުރު ނިމޭއިރު ރާއްޖޭގައި އުފައްދާ ކަރަންޓުގެ 33 ޕަސެންޓަކީ އިޔާދަކުރަނިވި ހަކަތައިން އުފައްދާ ކަރަންޓަށް ހެދުމަށް ޓަކައި ނިންމަވައިފައިވާކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ.

އެ މަނިކުފާނު މި ކަން އިއުލާންކުރެއްވީ ކޮޕް28 ސަމިޓުގައި މިއަދު ހަވީރު ތަގުރީރުކުރައްވަމުންނެވެ. ރައީސް ވިދާޅުވީ އެ މަނިކުފާނުގެ މި ސަރުކާރުގެ އަމާޒަކީ ރާއްޖޭގައި ކަރަންޓު އުފެއްދުމަށް ޓަކައި އިޔާދަކުރަނިވި ހަކަތައިގެ ނިޒާމެއް ގާއިމްކުރުންކަމަށެވެ.

އެގޮތުން އިޔާދަކުރަނިވި ހަކަތައިން ރާއްޖޭގައި އުފައްދާ ކަރަންޓުގެ ނިސްބަތް ކުރިއަށް އޮތް ފަސް އަހަރުގެ ތެރޭ 33 ޕަސެންޓަށް އިތުރުކުރައްވާނެކަމަށް އެމަނިކުފާނު ވިދާޅުވިއެވެ. ރައީސް ވިދާޅުވީ މިހާރު އެ ނިސްބަތް ހުރީ އެންމެ ހަަތަރު ޕަސެންޓުގައި ކަމަށެވެ.

އެގޮތުން ރައީސް ވިދާޅުވީ، ރާއްޖޭގައި މިހާރު އިއާދަކުރަނިވި ހަކަތަ ބޭނުން ކުރާ މިންވަރަކީ 4 އިންސައްތަ ކަމަށާއި އެމަނިކުފާނުގެ ސަރުކާރުގެ އަމާޒަކީ ކުރިއަށް އޮތް ފަސް އަހަރު ތެރޭ އެ އަދަދު 33 އިންސައްތައަށް ހެދުން ކަމަށެވެ. އަދި އެއަމާޒަށް ވާސިލުވުމަށް، ރާއްޖޭން އެންމެ މަދުވެގެން 600 މިލިއަން ޑޮލަރު ހޯދަން ޖެހޭކަން ފާހަގަ ކުރައްވައި ރައީސް ވަނީ ގައުމުތަކުގެ އެހީ ބޭނުންވާކަން ފާހަގަ ކުރައްވާފައެވެ.

"ބައްޕައެއްގެ ހައިސިއްޔަތުން ދަރިންގެ މުސްތަގުބަލަށްޓަކައި އަޅުގަނޑުގެ ޒިންމާތަކެއް އެބަހުރު. ލީޑަރެއްގެ ހައިސިއްޔަތުން ރައްޔިތުންނަށްޓަކައި އުފުލަން ޖެހޭ ޒިންމާތަކެއް އެބަހުރި. އަދި ދުނިޔޭގެ ފަރުދެއްގެ ހައިސިއްޔަތުން ވެސް އުފުލަން ޖެހޭ ޒިންމާތަކެއް އެބަހުރި. އަޅުގަނޑުމެންގެ އަމަލުތަކުގެ ސަބަބުން ހަރުދަނާ ނަތީޖާއެއް ނުކުންނާނެކަން ޔަގީން ކުރަން ޖެހޭ" ރައީސް ވިދާޅުވިއެވެ.

ރައީސް ވަނީ، ދިރިއުޅެވޭނެ ގޮތްތައް ބިނާކުރުމަށްޓަކައި އެކަށީގެންވާ މާޙައުލީ ނިޒާމެއްގެ މުހިންމުކަން ފާހަގަކުރައްވާފައެވެ. އަދި އެމަނިކުފާނު ވަނީ، މޫސުމަށް އަންނަ ބަދަލުތަކުން ލިބޭ ގެއްލުމުން އަރައިގަތުމަށް އެހީތެރިވާ 'ލޮސް އެންޑް ޑެމޭޖް ފަންޑު' ގެ ބޭނުން ހެޔޮ ގޮތުގައި ހިފޭނެ މަގުފަހިވެގެންދާނެ ކަމަށާއި، އެންމެ ބޮޑަށް ބޭނުން ޖެހިފައިވާ ފަރާތްތަކަށް ފަންޑުގެ މަދަދު ފަސޭހައިން ހޯދޭނެ ގޮތްތައް ފަހިވެގެންދާނެކަމަށް އުންމީދު ކުރައްވާކަމުގައި ވިދާޅުވެފައެވެ.