ތިލައުތުރު ފުޓްސަލް މުބާރާތުގެ ގުރުއަތުލުން ބާއްވައިފި

ތިލަދުންމަތީ އުތުރުބުރީގެ ރަށްތަކަށް ހުޅުވައިލައިގެން އަހަރަކު އެއް ފަހަރު އަތޮޅު ކައުންސިލުން އިންތިޒާމްކޮށްގެން ބާއްވާ”ތިލައުތުރު ފުޓްސަލް މުބާރާތް” ގުރުއަތުލުމުގެ ޙަފުލާ ބާއްވައިފިއެވެ.

ތިލައުތުރު ފުޓްސަލް މުބާރާތް” ގުރުއަތުލުމަށް ރޭ ކެލާގައި ބޭއްވި ކުލަގަދަ ރަސްމިއްޔާތު ޝަރަފުވެރި ކޮށްދެއްވީ، ރައްޔިތުންގެ މަޖިލީހުގެ ކެލާ ދާއިރާގެ ޢިއްޒަތްތެރި މެންބަރު އަލްފާޟިލް ޢަބްދުﷲ ޝަރީފެވެ.

ކެލާގައި ބޭއްވުމަށް ހަމަޖެހިފައިވާ، މި އަހަރުގެ ތިލައުތުރު ފުޓްސަލް މުބާރާތުގައި އަތޮޅުގެ 10 ރަށަކުން ވާދަކުރެއެވެ. އެއީ ތުރާކުނު، އުލިގަން، އިހަވަންދޫ، ދިއްދޫ، ވަށަފަށް، ފިއްލަދޫ، ކެލާ، ބާރަށް، އުތީމު، އަދި މުރައިދޫ އެވެ.

ދެ ގުރޫޕަކަށް ބަހައިލައިގެން ކުޅޭ މި ފުޓްސަލް މުބާރާތުގެ ގުރޫޕް A ގައި ހިމެނެނީ ވަށަފަށް، މުރައިދޫ، ދިއްދޫ، ބާރަށް އަދި ފިއްލަދޫއެވެ. ގުރޫޕް B ގައި ހިމެނެނީ ތުރާކުނު، އުތީމު، އުލިގަން، ކެލާ އަދި އިހަވަންދޫއެވެ.

ދިވެހިރާއްޖޭގެ ފަޚްރުވެރި “ނަޞްރުގެ ދުވަސް” ކަމުގައިވާ އަންނަ ނޮވެންބަރު މަހުގެ 3 ވަނަ ދުވަހު ފެށުމަށް ހަމަޖެހިފައިވާ “ތިލައުތުރު ފުޓްސަލް މުބާރާތް” ފައްޓާ މެޗްގައި ބައްދަލުކުރަނީ މުބާރާތުގެ އެންމެ ފަހުގެ ޗެމްޕިއަން ކަމުގައިވާ ވަށަފަރާއި، މި އަހަރުގެ މުބާރާތް ބާއްވާ ރަށް ކަމުގައިވާ ކެލާއެވެ. މިއީ މުބާރާތުގެ ދެ ގުރޫޕެއްގައި ހިމެނޭ ދެ ޓީމެއްގެ މެދުގައި މުބާރާތް ހުޅުވުމުގެ ގޮތުން ކުޅެވޭ ޝަރަފުވެރި އަދި އެހައިމެ ފޯރިގަދަ މެޗަކަށް ވެގެންދާނެ ކަމަށް ބެލެވެއެވެ. ނަމަވެސް މިއީ ކާމިޔާބު މިންކުރާ ގޮތަށް ކުޅެވޭ މެޗެއް ނޫނެވެ.

މި އަހަރުގެ ” ތިލައުތުރު ފުޓްސަލް މުބާރާތް”ގެ ފޯރި އިތުރުކޮށް ކާމިޔާބު މުބާރާތެއްގެ ގޮތުގައި ހެދުމަށް ކެލާ ކައުންސިލާއި، ހއ. އަތޮޅު ކައުންސިލުން ގުޅިގެން އަންނަނީ ގިނަގުނަ މަސައްކަތްތަކެއް ކުރަމުންނެވެ. މުބާރާތް ގުރުއަތުލުމަށް ރޭ ކެލާގައި ބޭއްވި ރަސްމިއްޔާތުގައި ހއ. އަތޮޅު ކައުންސިލުގެ ރައީސް މޫސާ ޝަފީޤާއި، އަތޮޅު ކައުންސިލާއި، މުބާރާތުގައި ވާދަކުރާ ރަށްތަކުގެ ކައުންސިލުތައް ތަމްސީލުކޮށްދޭ މަންދޫބުން ބައިވެރިވެލެއްވިއެވެ.

މަލިކުދަނޑީގެ ޘަޤާފީ ރަހަތަކުން ހިތްތަކަށް އުފާވެރިކަން ގެނެސްދިން މި ޙަފުލާގައި، މުބާރާތުގެ “ތީމް ލަވަ” އިފްތިތާޙްކުރުން ވެސް އޮތެވެ. ފުޓްބޯޅައާ ނުހަނު ގުޅޭ ގޮތަށް އަމިއްލަ ރާގަކަށް ހަދާފައިވާ މި ލަވަ ލޯންޗްކޮށްދެއްވީ މި ރަސްމިއްޔާތުގެ ޝަރަފުވެރި މެހްމާން ރައްޔިތުންގެ މަޖިލީހުގެ ކެލާ ދާއިރާގެ ޢިއްޒަތްތެރި މެންބަރު ޢަބްދުﷲ ޝަރީފެވެ.