ތާރީފުކުރުމަށް ލޯބިކުރެވުނުވަރަކަށް އިހްލާސްތެރިކަމުގެ ބައްތި ކަނިވަމުންދާނެ

އަމިއްލަ އެދުންތައް ބޮޑުވެ، ތާރީފުކުރުމަށް ލޯބިކުރެވުނުވަރަކަށް އިހްލާސްތެރިކަމުގެ ބައްތި ކަނިވަމުންދާނެ ކަމެކެވެ. އަހަރެމެން އެތާނގެމަތީގައި ދިރިއުޅޭ މިބިން، މާތްﷲ ވަނީ އަހަރެމެންނަށްޓަކައި ކިޔަމަންކޮށްދެއްވައި، އަހަރެމެންގެ ދިރިއުޅުމަށް ބޭނުންވާ ކަންޒުތަކާއި، ބާރުތަކާއި، ހަކަތަތަކާއި، މުއްސަނދިކަން އެ ބިމުގެ ތެރޭގައި ރައްކައުކޮށް ދެއްވާފައިވެއެވެ. އިންސާނާގެ މައްޗަށް އޮތީ، މި ތަކެތިން ފައިދާ ލިބިގަތުމަށްޓަކައި، އިހްލާސްތެރި ކަމާއެކު މަސައްކަތް ކުރުމެވެ.

އިސްލާމްދީނުގައި އަމަލުތައް ގަބޫލުކުރައްވާނީ ﷲ سُبْحَانَهُ وَتَعَالَى‎ ގެ ވަޖްހުފުޅަށްޓަކައި، ކުރެވޭ ކަމަކަށް ވާނަމައެވެ. ﷲގެ ހަޒްރަތުން ދަރުމައަށްއެދި، އެއްވެސް ކަންދެއްކުމެއް ނެތި، އިހްލާސްތެރި ކަމާއެކު އެކަމެއް ކޮށްގެންނެނެވެ. ހިތްނިޔަތް ރަނގަޅުކޮށް، ކުރާ ކަންތައްތައް ﷲ އަށް ހާލިސްކުރުމަކީ، ދުންޔަވީ އަމަލުތަކުގެ ދަރަޖައިން، އަޅުކަމުގެ ދަރަޖައަށް އެ ކަންތައްތައް ބަދަލުވެގެންދާނެ ކަމެކެވެ. ހަމަ އެފަދައިން ނިޔަތް ނުބައިވުމުގެ ސަބަބުން، ހެޔޮ އަމަލުތައް ފައިދާއެއް ނެތް ދުންޔަވީ ކަމަކަށް ބަދަލުވެގެން ދާނެއެވެ.

އަމިއްލަ އެދުންތައް ބޮޑުވެ، ތާރީފުކުރުމަށް ލޯބިކުރެވުނުވަރަކަށް އިހްލާސްތެރިކަމުގެ ބައްތި ކަނިވަމުންދާނެއެވެ. ފަހްރުވެރިވުމަށާއި، މަސްހޫރުވުމަށް ލޯބިކުރެވުނު ވަރަކަށް، އިހްލާސްތެރިކަން ފަނޑުވެގެންދާނެއެވެ. ﷲ ގަބޫލުކުރައްވަނީ އެއްވެސް ކިލަނބުކަމެއްނެތް، ސާފު ސާލިހް އަމަލުތަކެކެވެ. އިސްލާމްދީން ދެކޭގޮތުގައި، ކަންދެއްކުމަކީ، ޝިރްކުގެ ބާވަތެކެވެ. އަހަރެމެންގެ ރަނގަޅު އަމަލުތައް ނުބައި އަމަލުތަކަށް ބަދަލުކޮށްލާ އެންމެ ވަރުގަދަ ބާރަކީ ކަންދެއްކުމެވެ.