ރައީސް ދެއްވީ އުންމީދާއި ޤައުމީޖޯޝުންފުރިފައިވި ތަޤުރީރެއް

17 ނޮވެމްބަރ 2023 ވަނަދުވަހަކީ ދިވެހި ރާއްޖޭގެ 8 ވަނަ ރައީސުލްޖުމްހޫރިއްޔާ، ޑރ. މުހައްމަދު މުއިއްޒު ރައީސް ކަމުގެ ހުވާ ކުރެއްވި ދުވަހެވެ. ދިވެހީން ދިވެހީންގެ ރާއްޖެއަށް އަލުން އެނބުރި ދިޔުމުގެ ޚާއްޞަ ދަތުރަށް ރިޔާ ކޮށާލި ދުވަހެވެ. ހުވާ ކުރެއްވުމަށްފަހު، ރައީސް ދެއްވި ތަގުރީރަކީ ދިވެހިންނަށް ރައްކާތެރިކަން ލިބިގެން ދިޔަ، ގައުމިއްޔަތަށް ލޯބި ކުރާ ހިތްވަރުގަދަ، އުންމީދުން ފުރިގެންވާ ތަގުރީރެކެވެ.

ރައީސްގެ ތަގުރީރު ފަށައިގަތީ، ހުވާ ކުރައްވާ ރަސްމިއްޔާތު ބާއްވާ ތަނަށް އިޝާރާތް ކުރައްވަމުންނެވެ. "މި މައިދާނަކީތޯ؟ މިއީ، ޝަހީދު ޙުސައިން އާދަމާއި ދިވެހި ޤައުމު ދެކެ ލޯބިވި، އެނޫން އެފަދަ އެތައް ބަޠަލުންނެއް، އަޅުގަނޑުމެންގެ ފަޚުރުވެރި ދިވެހިރާއްޖެއާއި މާތްވެގެންވާ އިސްލާމްދީނުގެ ދިފާޢުގައި، ފުރާނައިން ޤުރުބާންވި ބަރަކާތްތެރި ފަސްގަނޑާ ގުޅިފައިވާ، ޝަރަފުވެރި މައިދާން!" ރައީސް ވިދާޅުވިއެވެ.

ދިވެހި ސަރުކާރުގެ ސިޔާސަތު ބިނާވާން ވާނީ، ދިވެހި ރައްޔިތުންނަށް އެންމެ މަސްލަހަތު ހުރި ގޮތުގެ މައްޗަށް ކަމަށާއި އެމަނިކުފާނަކީ ވެސް ދިވެއްސެއް ކަމުން ރައްޔިތުން އަންނަނީ ލިސްޓުގެ އެއްވަނަ އަށް ކަމަށް ރައީސް ވިދާޅުވިއެވެ. އަދި އެހެން ގައުމެއްގެ ބަޔަކު އަންނާނީ އޭގެ ފަހަތަށް ކަމަށް ރައީސް ވިދާޅުވިއެވެ.

ރައީސްގެ އަލިއަޅުއްވާލެއްވި އެއްކަމަކީ މި ފެއްޓެވި ދަތުރާއި ބެހޭ ގޮތުންނެވެ. އެގޮތުން ރައިސް ވިދާޅުވީ، މިއަދު މި ފަށަނީ ދިވެހި އުންމަތް އޭގެ ޙަޤީޤީ ބަނދަރާ ދިމާޔަށް މިސްރާބު ހެޔޮކޮށްލުމުގެ ދަތުރު ކަމަށާއި މިއީ، ދިވެހިވަންތަ ޤައުމީ ޝަޚްޞިއްޔަތު، އަންނާން އޮތް ޖީލުތަކަށް ފޯރުވައިދިނުމުގެ ބުރަ މަސައްކަތް ކަމަށެވެ.

ރައީސްގެ މިއިފްތިތާހީ ތަގުރީރު ވެގެން ދިޔައީ ގިނަ ބަޔަކަށް ހިތްވަރު ލިބި، އުންމީދު ލިބިގެން ދިޔަ ތަގުރީރަކަށެވެ. އެތަކެއް ބަޔަކު ވަނީ ރައީސްގެ މި ތަގުރީރަށް ތައުރީފު ކުރައްވާފައެވެ.