އާ މިނިސްޓްރީތަކަށް ޕީއެސްއިން ހޯދަން އިއުލާނުކޮށްފި

ރައީސް ޑރ. މުހައްމަދު މުއިއްޒުގެ ސަރުކާރުގައި އަަލަށް އުފެއްދެވި ވުޒާރާތަކުގެ ޕާމަނަންޓް ސެކްރެޓަރީ (ޕީއެސް)ގެ މަގާމަށް ކުރިމަތިލުމުގެ ފުރުސަތު ސިވިލް ސާވިސް ކޮމިޝަން (ސީއެސްސީ)ން އިއްޔެ ހުޅުވާލައިފިއެވެ.

ސީއެސްސީން އިއްޔެ ވަނީ ހަތަރު މިނިސްޓްރީއަކަށް ޕީއެސްއިން ހޯދަން އިއުލާނުކޮށްފައެވެ. އެއީ، މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަ މިނިސްޓްރީ އޮފް އެގްރިކަލްޗާ އެންޑް އެނިމަލް ވެލްފެއާ މިނިސްޓްރީ އޮފް ސިޓީސް، ލޯކަލް ގަވަންމަންޓް އެންޑް ޕަބްލިކް ވޯކްސް މިނިސްޓްރީ އޮފް ޔޫތު އެމްޕަވަމަންޓް، އިންފޮމޭޝަން އެންޑް އާޓްސް މިއީ ހުކުރު ދުވަހު ހުވާ ކުރެއްވި ރައީސް މުއިއްޒު އަލަށް އުފެއްދެވި ވުޒާރާތަކެވެ. ސަރުކާރުގެ ވުޒާރާތަކަށް ވަޒީރުންނާއި އެ ނޫން ވެސް ސަރުކާރުގެ މުހިއްމު މަގާމުތަކަށް ހުކުރު ދުވަހު ވަނީ ބޭފުޅުން އައްޔަންކޮށްފައެވެ. މި ސަރުކާރުގައި ޖުމުލަ 22 ވުޒާރާއެއް ހުރެއެވެ.

މި މަގާމުގެ ޝަރުތުތަކުގެ ތެރޭގައި ހިމެނެނީ ގައުމީ ސަނަދުތަކުގެ އޮނިގަނޑުން ދަށްވެގެން ލެވެލް ހަތެއްގެ ސަނަދެއް ހާސިލްކޮށްފައިވުމާ އެކު، ސަރުކާރުގައި، ޕަބްލިކް، ޕްރައިވެޓް، ގައުމީ ނުވަތަ ބައިނަލްއަޤުވާމީ ޖަމިއްޔާ ޖަމާއަތެއްގެ ހިންގުމުގެ ދާއިރާގައި މަދުވެގެން ހަ އަހަރު ދުވަހު މަސައްކަތްކޮށް ތަޖުރިބާ ލިބިފައިވާން ޖެހެއެވެ.

ނުވަތަ، ގައުމީ ސަނަދުތަކުގެ އޮނިގަނޑުން ދަށްވެގެން ލެވެލް ނުވައެއްގެ ސަނަދެއް ހާސިލްކޮށްފައިވުމާ އެކު، ސަރުކާރުގައި، ޕަބްލިކް، ޕްރައިވެޓް، ނުވަތަ ގައުމީ ނުވަތަ ބައިނަލްއަޤުވާމީ ޖަމިއްޔާ ނުވަތަ ޖަމާއަތެއްގެ ހިންގުމުގެ ދާއިރާގައި މަދުވެގެން ހަތަރު އަހަރު ދުވަހު މަސައްކަތްކޮށް ތަޖުރިބާ ލިބިފައިވުމެވެ. ޕާމަނަންޓް ސެކްރެޓަރީއެއްގެ އަސާސީ މުސާރައިގެ ގޮތިގައި މަހަކު 20،500ރުފިޔާ އަދި، ލިވިން އެލަވަންސްގެ ގޮތުގައި މަހަކު 15،000ރުފިޔާ ލިބޭނެއެވެ.

ސީއެސްސީން އިއްޔެ ވަނީ އަލަށް އުފެއްދި މިނިސްޓްރީތަކުގެ ޕީއެސްގެ މަގާމުތަކަށް މުވައްޒަފުން އައްޔަން ކުރެވެންދެން ވަގުތީ ގޮތުން ހަތަރު ބޭފުޅުންނާއި ޕީއެސްގެ މަގާމު ހަވާލުކޮށްފައެވެ.

ޕާމަނަންޓް ސެކްރެޓަރީގެ މަޤާމަށް ކުރިމަތިލުމަށް ބޭނުންވާ ފަރާތްތަކުން ހުށަހަޅަންޖެހޭ އެޕްލިކޭޝަން ފޯމު ކޮމިޝަނުގެ ކައުންޓަރުން ލިބެން ހުންނާނެއެވެ. ނުވަތަ، ކޮމިޝަނުގެ ވެބްސައިޓުން ޑައުންލޯޑު ކޮށްލެވޭނެއެވެ. މި މަގާމުތަކަށް ކުރިމަތިލެވޭނެ އެންމެ ފަހު ތާރީޚަކީ މި މަހުގެ 30 ވަނަ ދުވަހު މެންދުރު 14:00 އެވެ.